.~عرابجه في سويسرا.~

[~جغمه توت~]

أخباركم



في الصباح الباكر....

.

.

.

قمنا كلنا ورحنا للمطعم وافطرنا..وتمشينا حول الفندق وجاب سلطان تاكسي وعلى اقرب سوق..

مشاعل:جغمه خل نشتري اغراض المدرسه من هنا


انا:والله اذا اسعارهم معقوله..بس ما اظن اننا بنلقى شي رخيص

مشاعل:العام امجاد شاريه شنطتين من الاردن وصجتنا ست شهور اجل انا لو اخذ من هنا كم تتوقعين اصجهم!!

انا: ياربيه ليتك اخت وفاء عقوبه لها..؟

سلطان:يبا يمكن هنا الاي فون ارخص من السعوديه

انا:لا تلمح انت وهالقذله

سلطان: غطي خشمتس انتي بس؟؟

ابوي:ايه بس ترى مايصير معرب

سلطان:موب لازم انا ابيه يدعم اللغه عندي؟؟

انا: اوخص يبو دعم انت!!

سلطان: مشكله البزارين والفراغ..

انا:

مشاعل:يبا سينبون ابي ابي سينبون؟

سلطان:نعنبو بليسك توك مفطره انتي وين بتحطينه السينبون؟؟؟

انا:لو سمحت اختي العزيزه مابعد حلت

مشاعل:انطموا لامني شحذتكم اقعدوا نافخوا يبا ابي سينبون

أمي:اصبري لامنا تعبنا جينا وتقهوينا كلنا

مشاعل: طيب ابي ايس كريم؟؟

سلطان:

انا: سلطان اشغل مشاعل بمزحك السامج لا تشغلنا هي ببطنها؟؟

سلطان:موب شي مار غاديه مع هالحجاب الفسفوري تقل جحه!!

أنا:لا لا تقل مصاص ديمه ابو حميض؟؟

مشاعل:انطمي عاد انتي وهالوردي تقل علك باطوق؟؟

انا:بايخه بايخه؟.

امي:والله يبو سلطان كان وديتنا لسوق شعبي بيكون ارخص قاريه بالنت انه الاسواق الشعبيه دايم رخيصه

سلطان:يما هالكلام لو انك رايحه لمصر او اندونيسيا يصير عندهم اسواق شعبيه بس هنا ما اتوقع

ابوي:كل ديره فيها اسواق شعبيه ولا اوروبا من عمر الدنيا وهي ماركه؟؟ (واضح ان ابوي متأثر بكلامنا!!

السوق كان عادي صراحه غرناطه والرياض غاليري يسوونه مالقيت شي مميز الا جاكيتاتهم

دخلنا محل تقل سيتي ماكس كبير وفيه كل شي وكل واحد راح للقسم اللي يحب..

انا عند الجزم

مشاعل عند الاكسسوارات

امي وابوي عند قسم الطبخ والمطبخ

وسلطان ... مدري خفق ولاعاد شفناه..

جلست انا اجرب بجزمهم يعني يحبون العملي موب مثلنا اهم شي يكون شكله صح

المهم لقيت سبور حلو سماوي ورمادي ووردي وجلست اقيسه بس طلع صغير؟؟

وانا بالقوه ابيه يقد لي خاصه انو فيه جنبي واحد اشقر عيونه زرررررررررق وكل شوي يلتفت علي ولا ابيه يطيح وجهي اذا ما دخلت هالجزمه الغبيه

وانا اتميلح واحاول وطرف عيني يمين وشمال (بيني وبين نفسي):اكيد انه معجب فيني!!

هين اذا رحت للفندق ابغاير مشاعل واخيرا بيتحقق حلمي وابتزوج اوربي؟؟؟بس يبيلي خطه أليمه اقنع بها اهلي!!وااااو ابتزوج ابو عيون زريقه

المهم عاد انا سرحت بعالمي المخملي وجلست اخطط لحياتي الجميله بس يوم وصلت عند فقره وش

ابسمي عيالي....الا ذلي يخبطني على كتفي وانا اللي اشهق :وااااء والنعله مايردها الا ظهر ابو عيون زرق..

سلطان:طاعون,وش بتس يالخبله

انا غصت بهدومي:لييييييييه من بين رجال الكره الارضيه ما لقيت اضرب الاذا؟؟

سلطان التفت للرجال:سوري شي دزنت مين ايت؟؟

انا:ياربي ربااااه ليتني ماجيت لسوبسرا ولا جرى لي ماجرى!!

سلطان:خلاص يا شيخه شكله متفاهم

انا:ليتي الحين بالهرم وكافختن كل اللي بالمحل بدال ذا

سلطان:الحين القاه وصل بيته وانتي تحسرين

انا: كله منك يعلك للماحي لو انك جاي بلطف وش ضرك؟؟

سلطان: جيت بلطف بس مادريتي عني شكلتس رايحه في خبر كان.

انا:انطم بس وش تبي ؟؟

سلطان:فيه كم بدله ابيتس تشوفينهن

انا:انكانهن طقت بدل الهلال ريح مخي يرحم والديك

سلطان: قومي بس بعد هذا جزاي؟؟

انا: طرار ويتشرط

سلطان:موب بدل الهلال انتي وهالراس والله والشهره يعني بيوصلن هنا؟؟

رحت معه وانا قلبي لسا مقروح .....حسبي الله عليك يا سلطانوه

وراني بدلتين بصراحه مدري وشلون فكر فيهن ابد ابد موب ذوقه جينز اسود وبلوزه رمادي فاتح ومعها بلوزه فوقها رمادي غامق وابيض

والثانيه جينز ازرق فاااتح وبلوزه بيضاء اكمامها طويله وفيها ثلالث ازارير من فوق ..

انا:متاكد سلطان انك بتلبسهن؟؟ ولا بس تستهبل؟؟

سلطان:الحين انتي خلصيني زينات ولا لا؟؟

انا:الا يهبلن بس مدري احس مايصلحن لك احس تركيبه كراعينك ما تركب الا على ترنق الهلال واذا حبيت تجدد اللوك ترنق الاهلي

سلطان: اباخذهن اجربهن على كراعين عزوز..

انا: تسويها انت ووجهك؟؟صدق تبيهن لك؟؟

سلطان: ايه شكل لبسي غريب عليهم ابغير شوي؟؟

انا:طيب هذا ذوقك؟؟ماااش صعبه علي اقتنع؟؟

سلطان :شفت اثنين تو شايلينهن ويوم راحوا اخذتهن واعجبنني قلت اباخذهن بس ابتاكد انهن مايفشلن

انا:الله اخوي بيصير كشخه..

اخذ سلطان البدل وقاسهن وطلعن شي وراح اخذ له جزمات حلوه معهن وحزام(عشان عصه مايمسكه بنطلون؟؟ ومشينا نتقهوى مع البقيه

ابوي:سلطان وش شريت؟؟

سلطان:شويه اغراض

انا:يما تخيلي سلطان شرى ب...

سلطان:هييييييه انتي لي لسان ترى

انا: مدري خفت انك مستحي..

سلطان:شريت بدال جديده

انا:يما شرا جنز

سلطان: بزر..

امي:ملبوس العافيه وليدي

مشاعل:يبا ابي سينبون الكبير

انا:انا ما ابي شي شبعانه(غلقه ابو عيون زرق ملازمتني)


.


.

 

[حلا الدنيا]

منتظررين لبقية القصه بشوووق
لا تطووولين علينا جغمه

 

[™ τиτя]

المشاركة الأصلية كتبت بواسطة ~جغمه توت~

يووووه ذكرتيني وحده من ربعنا
رايحه مع زوجها تدرس باامريكا يوم رجعت لمدرستها
أبلشتهم بجزمة وانتم بكرامه قعدت سنتين ماغيرتها
فينا حركات مدري وش تبي .. زي اختي شرت مناكير من دبي
وكل من استخدمه هاشت عليه وتوزيه عنا في الاخير لقيناه بـ مي
<<يحلفون انها ماشرته الا عشان تقهرها !

ههههههههههههههههههههههههههههههههه اهم شي مصاص ديمه ام حميض
تبي عبايه فوشيه وحجابها فسفوريه .. حششى فُله صارت

هههههههههههههههههههه اذكر من زمان باإيتام على عزّه
كان يجيب كاوتشات الله يعزكم خقه .. وألقى لي واحد يهبل واحاول ادخله
ماطاع ولا في مقاس اكبر مير واحاول ادخله مالي دخل ابغاه ..لين جا واحد
قال يابنت الحلال مب داخل غصب هو .. وانا اللي القط وجهي

انا ماابي اوروبي ابي كوري
بس مايسوى عليك حلم نكد عليك ياسفاب السينابون كان خليتيه لي مب لازم تقولين ماابي
على فكره وش الهرم هذا ؟! ..فالسعوديه ؟؟ حلو طيب
أول مره اسمع به !!؟ شكله زي اهرام مصر يعني !!
<< يااااي يقالها بتسوي كشخه عليكم ماتعرفه
مير يامصله كرهته من المصاريه اللي يجونه

.

يازينك ويازين أسلوبك

هاتس

 

[~جغمه توت~]

أخبـــــــــاركم ~~

.


.


.



المهم تقهوينا ورحنا نتمشى بالتاكسي فيه قريه قريبه ويمدحون طبيعتها حيييييل رحنا لها ..

التاكسي:لازم تاخذون لكم جوله بالقارب فيه بحيره جميله جدا وتعجب كل الخليجيين اللي اوديهم لها

سلطان:وش هالجوله كم مدتها

التاكسي:المده اللي تبي قارب كبير ياخذكم ويلف بكم البحيره كلها وتقدرون تاخون غداكم وتتغدون بالقارب

انا:ايه يبا تكفى خلينا نروح

أمي:والله ما اواطن البحر خير شر

أنا:يما ذي بحيره موب عميقه وفيه بالقارب وسائل امان ذي اوربا يمااا

مشاعل:ودي اركب عشان اقول لميعاد بس ماش خايفه

سلطان:مشاعل انتي شكلتس ماجيتي هنا الا عشان تقهرين ميعاد!!

ابوي :طيب الحين نروح نشتري الغدا وبعدين نجي نشوف لنا قارب

السواق:فيه مطعم عربي قريب تبون اوديكم!!

سلطان:لا ياشيخ فكنا مالين من الاكل العربي

ابوي:التفت على امي وش تبون غدا يا مريم!!

امي:والله مدري اي شي

السواق شافنا محتارين قال:فيه مطعم سندوتشات لذيذ جدا ومناسب لانه انتو مارح تتغدون الحين والسندوتشات تصبر مده طويله ماتبرد

ابوي:على بركه الله مشينا..

رحنا لذاك المطعم ونزل ابوي وسلطان وراحوا يجيبون الغداء وفيه سوبر ماركت صغير جنب المطعم

امي:ابروح للبقاله شوي

انا ومشاعل:بنجي معك

رحنا للبقاله وامي على طول قسم الفواكه واخذت تشكيله فاكهه وعصاير وماء بارد وبيبسي ,وانا ومشاعل بطاطسات وشوكلاته

حاسبنا بسرعه وطلعنا وجا ابوي ومشينا..

امي:عسى اكلهم زين!!

سلطان:والله يهبل شكلي بس ابتغدى الحين

ابوي:مره نضيف وشغل مرتب

وصلنا البحيره وكانت جنه والمويه صآآآآآفيه تشوفون قاعها

سلطان:يازين من سبح فيها ذي

ابوي:اسأله تصلح للسباحه اخاف نطب همن يجون يقشونا

سلطان سال السواق وقال:عادي ابحوا بس من الناحيه الثانيه لمن تركبون القارب تكون احلى وانسب للسباحه..

امي:اجل نركب القارب الحين والسباحه اذا وصلنا هناك

راح ابوي مع السواق يشوفون لنا قارب واتفقوا مع واحد وكان القارب كبييير اقدر اقول يخت مو قارب

ركبنا فيه ومشينا ...

مشاعل:اشوا ما يخوف

انا:يا سلام احسن شي سويناه لحد الحين...

أمي:سبحان الله شوفو وشلون المويه صافيه تقل قزازه

مشاعل قامت تقل مقروصه وركضت لمقدمت اليخت وتمسكت بالحديده وسوت زي حركه التايتنك الشهيره

انا وسلطان:

مشاعل التفتت جغمه تعالي جربي يهببببببببل

انا:تكفين ياروز فكينا

مشاعل: بكيفتس بس والله شي حركه

قمت انا ورحت لها بس ابجبر بخاطرها ماودي تتفشل

انا :وخري شوي انا عاد ابرقى

مشاعل:لا تطيحين همن تفرمتس السفينه

انا:ابتمسك بس وخري وارقى واتمسك واطلق العنان لنفسي...........

والله مشاعل صادقه شي هالحركه تمنيت في ذيك اللحظه ان اللي يسوق ابوي عشان اشيل عبايتي

واخلي شعري يتطاير

المهم وانا استمتع باللحظات هذي ألا ويلوح لي طيف ابو عيون زرق اييييييه صدق من قال الماء والخضره

والوجه الحسن....يارب تعوضنا في جنات النعيم


مشاعل:خلاااص دوري وخري أصلن انا اللي مخترعته

انا:ايه الله لايبارك فيتس جبتيني واشعلتي جمره جروحي!!!

قرب لنا سلطان ومييير احط رجلي وانزل بسرعه اخبره وحركاته البايخه وجت مشاعل بسرعه ورقت بمكاني يقالها بتسبقني لا ارجع ثانيه..

انا:جاك الموت يا تارك الصلاه...

مشاعل:

قرب سلطان وعلى طول مسك مشاعل وقعد يهزها وهي تصارخ

سلطان:منهو عمتس!!

مشاعل:يمآآآآآآآ اتركني الله يمحاك يمآآآآآآآآآآآآآآآآآآآآ

سلطان:طيب منهو عمتس!!

مشاعل:عمي حمد الله ياخذك نزلني

سلطان:خطاء حاولي ثانيه..منهو عمتس

مشاعل:بدت تصيح يمااااااا يمااااااااااااا يماااااااااااااااااااا

جت امي بسرعه :وشو وش فيكم!!

سلطان: ترك مشاعل بسرعه

مشاعل:الله يمحاك طس عني وراحت لامي سلطان يدفدفني على الماء...

امي: اعوذ بالله انت وش مسلطك عليها..

سلطان: هي وشوله واقفه على الحفه انا بس اخوفها عشان ماتسوي كذا ثانيه!!!

أمي:ماعليك منها خلها تسوي اللي تبي والله موب جايب لها المصيبه الا انت!!

سلطان:سري امها خلاص!!

أنا:المره الجايه بنخليك ونجيب محمد <<وطيران ركض لابوي!!

ابوي طاقها صحبه مع السواق جلسنا كلنا مع بعض بجلسه كنب بالسطح والجو شي بس اذا مشى بسرعه برد...

مشاعل جايبه اونو ولعبنا فيها وطبعا سلطان بكل لعبه يغش!! لين طلعه ابوي برا اللعبه

أمي:والله جعت ابحط الغدا

ابوي :ايوالله خل نتغدا عشان نقول له يودينا نسبح

فلينا غدانا وغسلنا الفاكهه وجبنا العصير والبيبسي وجلسنا على طاوله طعام وطبعا زايدين للسواق وعطيناه وشكرنا كثير..
تغدينا ورحنا للشاطيء وسبحنا كلنا وكان المكان رهييييييييب بس المويه مرررره بارده يالله قوينا نسبح

ابوي:والله مااش الماء بارد انتبهوا يا بنات..

سلطان داخل من زمان ومتعود على بروده الماء..

سلطان:جغمه!!تعالي والله فله الماء رهيييب

انا :وخر بس انا ابتعود عليه اول تدريجيا

سلطان: طيب تعالي شوفي هنا دافي شكله يجي من بين هالصخور

انا:ايه رح بعيد وابجي أنا ,راح سلطان يسبح وانا ومشاعل جلسنا نتجسر شوي شوي

مشاعل:يالله نعد لين خمسه ونغطس جميع

انا:خبله انتي وان جاني جلطه بسم الله علي؟؟

مشاعل :انا ابسويها وعدت لين خمسه وغطست وطلعت على طول وقعدت تشاهق خمس دقايق من البرد وبعدين تعودت

مشاعل:يالله والله احساس رهيييب,ابقولتس تذكري حر الرياض واذا مره حسيتي انتس بعز القايله طبي وااااو

انا :ودي بس برررررد ,ونزلت رجولي وشيئا فشيئا صرت واقفه بالماء بس نصي ماجاه ماء

الا واحس بحركه وراي وعلى طول عرفت انه سلطان بس التفت ابحلف عليه الا مادريت الا خشمي بوسط قاع البحيره

وااااوك واشاهق ياربيه باااارد الله يقلعك يا سلطان ياشين طلعه بها ولد!!

سلطان :حلاتها كذا بالمغامره موب نمشي وانتي لسا تدربين!!

امي :شف يبو سلطان بكرا ان شاء الله بنروح لمنطقه ثلجيه خاطري اشوفها على الطبيعه

ابوي:طيب من عيوني

امي: عسى ما يحرمني منك...

انا وسلطان ومشاعل:

.


.


.

 

[جنية إن ذا قوطي]

ههههههههههه عسى الله لا يحرمكم من سلطان حبيته هالولد أحس ما عطى الطلعة أكشن إلا هو , ما ترسلونه لنا بس شوي ونرجعه , كملي يا بنت كملي ويا ويلك لو يصير سلطان عقب بثر

 

[~جغمه توت~]

:في الصباح الباكر وبعد الفطور والتقهوي (بيني وبينكم ادمنا القهوه حقتهم لذييييييذه وتصحصح)


اخذنا عفشنا وتوجهنا لمدينه لوزان

امي:ماشاء الله تهبل هنا انا شكلي ابنبسط مره

ابوي:عشان الثلج يعني

امي:ايه وبعد هنا هدوء والطبيعه احسن

انا:مدري انا حبيت زيورخ اكثر شي عساها بس تصير ذي مثلها

مشاعل:وش رايكم تسولفون بعدين ونروح الحين نتغدا؟؟

ابوي:خل نريح الى العصر ونطلع مره وحده

عاد هنا بلوزان اخذنا كوخ فيه ثلاث غرف ومطبخ وصاله ودورتين مياااه,حنا اكتشفنا نظام الاكواخ والشقق ذا بوقت متاخر ولا عندهم شقق مجهزه بكل الاشياء..

وكوخنا فيه كل شي الى خلاط الكيك موجود

ابوي:يا سلام هنا يمديكم تطبخون لنا

مشاعل:حنا ماجينا نطبخ ملحقين عليه بالسعوديه

ابوي:ميخالف يبا بس الواحد يمل من المطاعم ولا وش رايتس مريم؟؟

امي:الا والله وبكرى شعولتي تسوي لنا احسن فطور

انا: يازين من صك اثمه بس

نمنا شوي وعلى العصر قمنا وصلينا وجلسنا عند التلفزيون

امي:والله انا ميت حيلي مابي اطلع اليوم

مشاعل: يماااا

امي :تعبانه ومليت من الهجهجه روحوا انتم وانا ابقعد بالبيت

ابوي:لا خلاص كلنا نريح اليوم وشلون نتركتس لحالتس يامريم

امي:روحوا انا ابطلع بالحديقه اتمشى واذا اظلمت ابدخل جوا

ابوي:لا لا بس ابروح انا وسلطان نجيب غدا واغراض للبيت ونجي

مشاعل:يبا ابروح معك

ابوي :يالله بسرعه البسي

سلطان:هيه انتي تراتس كبرتي على هالحركات كل مشوار بتروحين له!!

مشاعل: وش دخلك انت

طلعوا الربع يجيبون الاغراض وانا وامي جلسنا بالبيت نستكشف الدواليب والحديقه وكل شي وقنا به

امي:ما اشتهيت الا كاس شاهي منعنع

انا:اكيد ابوي بيجيب مايستغني عن الشاهي

امي:والله هنا مره برد الله يعينا بالليل

انا :اذا برد نشغل هالدفايه اللي كبر الجحش

طلعنا انا وامي برا نتمشى سبحان الله فقط توقفين وتناظرين هالطبيعه شيء لا يمكن الضجر منه!!

برى فيه طاوله كبيره وحولها كراسي وفوقها مظله عشان في اي وقت ممكن تمطر او ينزل ثلج..

أمي بنشب هنا نار ونتقهوى الشاهي بعد الغدا فيه رتبنا انا وامي الطاوله وجهزنا صينيه الشاهي..وجو ابوي واخواني وتغدينا وجلسنا نسولف برا عند النار

ابوي:جبت عده شوي قلت نتعشى هنا بدال المشوره كل شوي

امي :زين سويت

مشاعل:ماش ذولا بقالتهم خايسه ما فيها شي اعرفه

انا:احسن شي يمكن الجديد يصير احسن

سلطان:يا انا ابضبط لكم مشوي اليوم تاكلون اصابعكم معه

مشاعل:فكنا من مطاريسك

سلطان:انتي بالذات مارح تاكلين يالدبا

مشاعل:

جلسنا حول النار نتجاذب اطراف الحديتمع كوب الشاي المنعنعحتى المساء شوي نلعب اونو

وشوي باصره وشوي نلعب حبشه ونآآآآآآآآآآسه لحد وقت الشوي

وكل واحد له شغله يسويها ...وضبط المشوي وتعشينا وتواعدنا ننام بدري عشان بكرا عندنا رحله مشوقه


.


.


.

 

[جنية إن ذا قوطي]

مقاطعة << ممكن تعرفينا على الباصرة , الأونو وعرفناها بس هذي شكلها زاحفة مثل الأونو وأنا أحب الزحف

 

[~جغمه توت~]

جنيه هذي الله يسلمك لعبه نلعبها بالعكوس حلوه ترتبين الاوراق على حسب الاكبر طبعا بدون ما تشوفينهن وهن مقلوبات؟؟؟مدري وصلت <<من زين الشرح!!

 

[ماعندي ماعند جدتي]

كملي

سين سؤال هو صدق والا خيااال>>>>>> ناويه اطبق خطتك عشان اسافر برااااااا

 

[غموض]

توته
وينك رحتي وقلتي عدو لي
اذا المانع الإختبارات معذوره
اذا لا امشي قدامي وكملي لنا
نحنو في إنتظارك

 

[ابو خشم]

سلطان يذكرني بشخص بثر ما قد شفت ابثر منه..واعتقد ان سلطان من النوع الي يحب التخريب..
عالعموم..واصلي كتابتك والى القدام!!!

 

[ابو خشم]

اخر رد لـ جغمه 16-6!!!
واليوم 16-7!!!!!
يا اني جاي متأخر او اني جاي متأخر,,

 

[هاله]

ننتظرك

 

[~جغمه توت~]

أعتذر عن تأخري كثيييييير



.


.


.



قمنا من بكرى بدري وافطرنا واخذنا لنا تصبيرات وتوجهنا الى الجبال الثلجيه


امي:أخذتوا جاكيتاتكم كلكم؟؟

حنا:ايه ايه..

أنا:من الغبي اللي بينساه؟؟

مشاعل:أنا دهنت رجولي بفازلين ولبست شراب العائله ومع هالبوت ان شاء الله وضعي تمام

أنا:منين لك الفازلين؟

مشاعل:جايبته معي تخبرين كثر المشي يوجع الرجول وقلت ادهن به رجولي بالليل!!

أنا:حشى جده موب أخت

سلطان:والله مدري وش الفايده من الروحه للبرد؟؟احد يروح للموت برجوله؟؟

أنا:يعني على اساس مررره مال من البرد والثلوج!!

سلطان:يعني طبيعه اوكي ,بحر اوكي ,سباحه وفله اوكي,بس ثلج؟؟

أنا: يا سلااااااااااااام امنيه عمري ذي!!

سلطان:يعني وش المثير كل اللي تشوفينه ابيض ,ملل!!

مشاعل:العب الدوده بجوالك<<خخخخ مغبره!!

سلطان:كفخ مشاغل :اقول عطيني الكاميرا بس!!

اوف ياكرهه هالشين اذا صار معصب ولا زهقان يقلب 120 درجه

وصلنا للمنطقه وكان الثلج مغطي المكان والسياح مبسوطيييين اللي يلعب بالثلج واللي يتزلج واللي جالس بهدوء

انا ومشاعل ركضنا ومسكنا الثلج وجلسنا نلعب فيه ونسوي كور ونرميها على بعض ونتلاحق

وكل شوي تكبر الكوره لين ماااصارت الضربه اليمممممه...


أنا:مشاعل تعالي نسوي رجل الثلج

مشاعل:يله يله يآآآآآآآآه يا جغمه حنا بحلم ولا بعلم!!

أنا:ههههههههههههههههه تعالي اكفختس عشان تصدقين

جلسنا نسوي رجل الثلج وبدت يدينا تتخدر بفعل البروده جا سلطان وهو يشوت الثلج

سلطان:وش تسوون؟؟

مشاعل:رجل الثلج لا يفوتك تعال

سلطان:الله من الفضاوه ,يعني بتطبقون حركات توم وجيري على الطبيعه؟؟

انا:لا ماعندك سالفه نقلد سالي

قرب سلطان وشات الرجل الثلجي وطار راسه!!وميييير اعصب واخذ هاك الكوره اللي كبر راسه والخه مع خشته..

سلطان انصدم وطارت عيونه وفرك عيونه اللي خش فيه الثلج وتأهب بيسوي كوره كبيره واحط رجلي

وسلطان وراي واركض واحاول اخذ ثلج بيدي بسرعهوأنا توي رافعه راسي الا والكوره تصقع ظهري

وانا التفت وارمي عليه.. يوووووه العيال ما ينمزح معهم!!

وجلسنا نتكافخ ونضحك وركبنا تلفريك وتزلجنا<<صحيح الوقت راح وحنا نتعلم بس وناسه..ورجعنا للبيت لان امي مرررره بردانه وقررنا نجي بكرى بس بالظهر..

.

.

.

مشاعل:يبا متى بنرجع للسعوديه!!

ابوي:بقى لنا اربع ايام ونرجع

مشاعل:يبا ودنا نجلس زياده

ابوي:الحين انتي انبسطي بهاليومين ولا تفكرين ببعدين.

انا:والله الرياض لها وحشه

سلطان:انا هالسنه تحديدا كاره الرياض!! حر وزحمه ونفوس شينه..

انا:والله وحشوني صديقاتي ووحشتني هناء وقله ادبها

سلطان:اتخيل عزوز الحين مفهي بالاستراحه ,متمدد عند التلفزيون ويقشم حب

انا:جبت له هديه؟؟

سلطان:مايصلح له شي هنا اذا رحت للرياض اباخذ له العصا اللي تحك الظهر يدورها من زمان!!

انا: وهذي يقالك هديه اقول ما ادج منك الا خويك..

سلطان:يعني بالله وش آخذ له؟؟

انا:يعني تي شيرت/قبعه/ساعه اي شي!!

سلطان:كل ذولي مايلبسهن ابو العز

انا:انت ابخص

مشاعل:يما اباخذ لميعاد هديه..

امي:وش بتاخذين؟؟

مشاعل :مدري وش رايتس انتي

امي :خوذي بوك ولا شنطه

مشاعل:لااااا ماتشتهي هي ماعمرها جابت لي شي

امي: الحمد لله انتي اللي تقولين اباخذ لها هديه؟؟

مشاعلكايه هديه تمشي الحال مو بوك!!

انا:طيب خوذي ذيك المجموعه اللي شفناها بالسوق((شنطه صغيره بها قلوسات بنكهات مختلفه ومناكير حلوه لونين وماسكارا زرقا))كل شنطه فيها الوان محدده..حلوه وتنفع هدايا

مشاعل:يبا يمدينا نروح للسوق قبل نرجع؟؟؟

ابوي ان شاء الله بعد بكرى نروح وتاخذون اللي تبون عشان مارح نرجع السوق ثانيه

.

.

.

 

[بتول]

كملي ..ومتابعه

 

[طن الا نكس ابوثنين]

وبعدين مهيب مخلصه القصه
الظاهر بياخذ المنتدا الاول في قائمة قوقل من كثر مادخل قوقل وابحث عن هالمنتدا المنحرف
واخرتها انسحبت على وجهي وسجلت عشان اقولك انجزي
وسوالفك انتي والعائله االمصونه مسكته بس ذليتي ابونا اخلصي

 

[~جغمه توت~]

أخباركم وحشتوني والله بس يالله اللي يعيش بمنطقه النت فيها زفففففت له عذر اكيد



يالله هانت حنا بمشارف نهايه السالفه...


.

.

.

من بعد رحلتنا الجبليه الثلجيه رجعنا لبيتنا الدافي الجميل (بيني وبينكم)أنا عشقت

هالبيت حسيت أنه يناسبني بحكم اني مرفهه ولا تطيح عيني الا على الزين!! الوحده وش تبي

أكثر من كوخ وأثاث بسيط وأنيق وأحدث الأجهزه؟؟ ياربي على البساطه بس!!

المهم من بكرى صحينا بكير وحنا على الفطور..

سلطان:يبا أنا ما فيني للطلعه اليوم ابجلس بالبيت وانام!!

أمي:وشو!! لا لا ما فيه جلسه بالبيت ان جلست فآأنا خويتك

سلطان:يمآآ والله أمس ملل مابي اليوم اروح

امي:حنا جايين علشان ننبسط

أنا:يما يا حبك للدراما خليه يجلس خلينا نفتك من خشته لو يوم

سلطان:أنتي فورا ابلعي لسانتس

أبوي:شف اذا بتجلس ابوصيك على شغيلات تسويها..

انا:سلطان تكفى نبي عشانا اليوم كبسه من يدينك

سلطان سفهني وقام لغرفته وناداه ابوي:هاه وش صرت بتجي ولا لا؟؟

سلطان وهو يتحلطم :الا ابجي بعد فاضي اتمشور؟؟

طلعنا بنروح للسوق ومن السوق بنكمل للمنتزه الجبلي..

مشاعل :جغمه تصيرين أكبر غبيه لو ما شريتي من هنا شي؟؟

أنا:ابحط نصيحتس الثمينه بعين الاعتبار اختي العزيزه..

سلطان يمشي ويشوت اي شي بطريقه هالولد اذا كان متضايق يقلب مزاجه ويتعكر كل اليوم؟؟

أنا:سلطان يا حركات لابس البدله الكشخه!!صاير صح

سلطان:ناظر نفسه بسرعه وقال:داري!!<<ابوتس يالثقه من متى!!

انا:منين هالثقه يبو ما خبرنا الا ترنقات الله اعلم بها..

سلطان:أنا حاس انه اليوم بتصير مصارعه

أنا:ترى محمد يسلم عليك كلمته اليوم<<محمد اخوي انكانكم نسيتوه

سلطان:وش عنده أبو كرشه؟؟ والله له وحشه!!

أنا:ماعليه يقول ان عزوز ابلشه عنك يقول ماكلمني له يومين!!

سلطان: بعدي عزوز فاقدني!!

:(سبحان الله اذا نبي نحسن مزاج سلطان نجيب طاري عزوز)

أنا:طيب دق عليه لا تصيح علينا نبلش فيك

سلطان:ودي اشوف رده فعله اذا شافني لابس هالبدله

انا:عادي بتحوم تسبده

سلطان:لااا اصلن عزوز دايم يمدحني يقول اني اشبه الاتراك.. يمكنه عاد هو يبالغ شوي بس هو

يقارني بخشته بديهي ابصير كني الاتراك؟؟

انا:تراه احسن منك !!على الاقل هو حليل

سلطان:اقول لا يكثر وانتي وش دراتس؟؟على فكره!!وناظرني بخبث!!:ترى عزوز خاطبتس مني!!

أنا: اقول طس انت واياه مابقى الا هالقروي!!حتى عمره ما طب غير ديره جدته!!

سلطان:عاد الله أكبر يالرحاله ابن بطوطه ما خليتي شبر بالعالم!!

أنا:حتى لو يالله بس تلايص انت واياه!!واقمز عند مشاعل ..بعد عزوزوه!!!

.......................


بالسوق جلسنا ندور ونتسوق ومشاعل اشترت لصديقتها هديه وامي وابوي شروا خرابيط واجده وسلطان يحوس بمحل اجهزه كمبيوتر وجوالات...

انا جلست افكر بكلام سلطان؟؟معقول مصيري يرتبط بعزوز!!ماااش صعبه عقب ما حطيت ببالي ابو عيون زرق؟؟

جلست اتذكر شكل عزوز(اذكر اكثر شي يشد الواحد بعزوز اذانه ,بالحيل طالعات؟؟واذكر له سن اطول من

الثاني؟؟ ,ويعني هو اطول من سلطان بشوي بس انه جلد وعظم لدرجه كراعينه كنها حطب

مكوم؟؟ واذكر الفنيله والسروال هي زيه الرسمي بكل مكان وبجميع الاوقات؟؟

بس انه حق الايام العاديه عند الركب مشقوق //وحق المناسبات الرسميه لا لا سليم ,وهوايات عزوز

المفضله تنبيط جبهتي انا ومشاعل دايم ؟؟وسرقه اي شي فيه شوكولاته؟؟

يعني ما أذكر ولا حادثه رومانسيه صارت لي معه وحنا صغار عشان يخطبني من سلطان؟؟

الا اذكر انه مره متجمعين عيال الحاره عند بيتنا يلعبون بالمصاقيل وطلعت انا ومشاعل نشوفهم؟؟وحنا

واقفات عند الباب ,الا وذيك الحصاه اللي تستقر ما بين مقلتي الجميلتين!! وأصيح وافقع واصيح

على كثر تنبيط عزوز بس هذا يا لطيف بازوكه مو نبيطه!!

ويجي عنتر زمانه عزوز ويسطر الولد ويكفخه ويهوش :خيييييييير تضرب اخت صديقي؟؟

انحاش الولد بعد ما تسطر وجا عزوز لمنا وهو ينافخ:وشوله تطلعون انتم؟؟

والله لا اعلم سلطان تراه بس راح للبقاله وبيجي الحين؟؟

انا:علمه ما خفت تراي لا منك ولا منه!!(يا عمري توني مفلوقه وهو يهاوشني)؟؟

عزوز:ادخلي بسرعه لا انا الحين اجيب نبيطتي واوريتس!!

انا:(يعني بيوفرني له هو وسنه هالمكسور!!


انا:اتحداااااااااك؟؟<<اذكر اني خربتها شوي!!ولا انا جبانه

والله ويستعين بربه ويجرني مع شوشتي للبيت//.....انتهى,

هذا هو الموقف انكانه يحسب انه يقوطر رومانسيه فآآآيا بختي

حسبي الله على عدوانك يا سلطان انكانك خربت جوي؟؟

 

[~جغمه توت~]

طلعنا من السوق ورحنا للمنتزه..وكان المكان مرررره زحمه بالنسبه للتزلج!!

حطينا اغراضنا على طاوله وجلسنا ناديت مشاعل ورحنا نلعب بالثلج واخذنا الكاميرا ورحنا نصور ..

مشاعل:ابسوي رجل ثلج واصور معه

انا:طيب ابجيب شال ابوي وكم حصاه عشان يضبط..

رحت لطاولتنا :يبا عطني شالك شوي ابرجعه الحين

امي:وشوله خلى ابوتس يدفا

ابوي:ميخالف يا مريم دفا تراه مو زي امس

سلطان:جغمه وش تسوون؟؟

انا: رجل ثلج

سلطان:ابجي اسوي معكم؟؟

انا: بس امانه لا تخرب علينا ترىاليوم اخر يوم لنا مع الثلج

سلطان:انا اصلن راحمكم انتم والغول اللي سويتوه امس ؟؟حتى فشلتونا بيقولون ذولا مسوين بقره ثلج مو رجل ثلج!!

انا: عاد والله حنا حرين باللي نسويه!!

رحنا لمشاعل وهي بس شافت سلطان ووقفت تحلف وتقسم عليه ما يخرب اللي سوته

سلطان:وخري اقول انتي وشو ذا الشكل بالضبط!!

مشاعل:رجل ثلج بس بنعدله اول بنخليه كبير وبعدين نشكله

سلطان قرب وصار يحوس معنا وصلحنا رجل كشخه وصورنا معه وبعدين كل واحد صار يسوي شكل الثاني

ونصورهن وبعدين سلطان سوا واحد كنه عزوز وصور معه عشان يوريه اياه!!وضحكنا وتكافخنا وانبسطنا..

وجلسنا نودع المكان عشان بعد بكرى بنمشي وحنا قررنا بكرى نجلس بالبيت وننبسط بالكوخ والحديقه والريف اللي حولنا وعشان نجهز لرحله العوده..

مشاعل:جغمه ودي اصيح!! ما ابي نرجع

انا:لا تصيرين طماعه تمشينا وانبسطنا وان شاء الله السنه الجايه نجي..

سلطان:ما بعد خلصتوا صايحين؟؟

انا:يا سمجك!!

رجعنا للبيت واتفقنا نصلح كبسه دجاج تعشينا وكانت الذ كبسه اكلتها وهات يا سوالف مع الشاهي المنعنع وكلمنا اهلي هناك وقلنا لهم يستقبلونا بالمطار بعد بكرى..

امي وابوي قاموا ينامون..وانا ومشاعل وسلطان جلسنا برى عند النار نسولف..

سلطان:قوموا نشوف التلفزيون انا اليوم جبت فلم روووعه

انا:يالله من زمان عن الافلام؟..

تفرجنا على الفلم وسلطان تحمس مررره عشان الفلم اكشن..

سلطان:شكلي ابعطي عزوز الفلم هديه

أنا:يعني يقالك الحين ذابحك تأنيب الضمير؟؟

سلطان:لا بس مستحي اروح وانا ما جبت له شي وهو صراحه حمار ما كل شي يجوز له!!

انابيني وبين نفسي)الله يا عزوز تطورات ما يعجبك شي عاد من زينك)!!

سلطان:وين فهيتي.؟؟

انا:هاه خلاص هو بيتفهم عاد قروي وش بتلقى له هنا؟؟

سلطان ضحك بقوووه :ابقوله انتس تسبينه؟؟اخليه يأدبتس اذا اخذتس؟؟

انا: الشرهه على اللي يجلس معك

وقمت ابروح لغرفتنا شكل ثقيل هالدم بيغثني..

سلطان:خلاص خلاص والله ما اقول شي الحين تعالوا خل نطلع برى نسهر نودع سويسر لاند..

طلعنا برى عند النار وجلسنا لين الفجر صلينا ونمنا...

في الصباح امي وابوي قاموا بدري وافطروا وجلسوا بالحديقه وحنا نايمين...الييين الظهر

ابوي:سلطان قم يبا معي بنروح نشوف اوراق حجزنا ما نبي نبلش بكرى سلطاااان..

سلطان:طيب طيب خشششش

ابوي:قم يالله يمديك تنام بالسعوديه لين تشبع

سلطان :يباااا تكفى رح لحالك والله دايخ

امي:سلطااان؟؟قم مع ابوك بسرعه حتى مأذن الظهر ترى

سلطان قام وغسل وصلى وراح مع ابوي وانا ومشاعل صلينا واجلسنا نفطر..

انا:يما ليش ابوي دايم يخلي سلطان يروح معه واذا بغى يجلس يعيي عليه؟؟

امي:يبيه يتعود على الطلعه معنا زمع ابوه هالولد حاصر نفسه مع ربعه بس وابوه يبيه يتغير عشان اذا رجعنا يكون ارتباطه بنا اسهل..

أنا:والله ابوي حكيم..

امي:والله الفكره فكرتي ترى؟؟

انا:اووو اجل امي حكيمه

مشاعل:تصدقون بديت اشتاق للسعوديه..

انا:مبرووووووووك انحلت العقده يعني؟؟

امي:كلنا والله الله لا يحرمنا بس..

من بكرى ودعنا بيتنا وودعنا آخر ما شافته عيونا من سويسرا الحلم الجميل وركبنا طيارتنا محملين بشوق

لاهلنا وديرتنا وبيتنا الحميم ...وكلنا امل نجتمع مره ثانيه مع اجمل مكان شفناه بحياتنا...





انتهت سولافتي البسيطه <<ما بغت..هههههه والعذر والسموحه منكم للإطاله بس والله مو بيدي ...


واللحين جاهزين لأخذ آرائكم..


لكم اجمل التحايا

 

[جنية إن ذا قوطي]

حرام عليتس وش ثلج ومال ثلج وأنا توي طالعة من المطبخ درجة الحرارة 60 !! سولافتس جميلة جدا بس لو أنتس حاطتن لي دور فيها , يعني لفزتيني وكثرتي من الرخيص وركزتي بصورة ((عارمة)) علي , ولا ترا إذا جيتونا بالعيد , ولا جيتوا عشان تحضرون العرس << إلا على فكرة وش قررتوا تجون عشان العيد ولا عشان العرس ؟؟؟؟ المهم أنا أبغى دور جوهري مثلاً أطلعلكم شبيك لبيك ولا مثلاً أصير دور الجلادة ولا الفارسة المغوارة , يسلموا الأنامل يا بطلة بس لا تنسيني المرة الجاية إذا رحتوا لأسبانيا << ولا ما عندكم إلا الحفر وتخب وتسحب ويبيلها خبان

 

[~جغمه توت~]

^

^

^



تسلمين ’وابشري سولافتي القادمه جنيه والاقزام السبع طعش!!

بالنسبه لجيتنا ابشرتس بنجي للعيد وللعرس ..يآآآحظكم